美荷樓生活館
2013-11-14 13:27:30

1953年的一場石硤尾大火,數以萬人無家可歸,為安置災民,美荷樓成為香港首批徙置式公屋,沿用至2006年; 經「活化歷史建築伙伴計劃」,獲評為二級歷史建築的美荷樓現已搖身一變成為「美荷樓青年旅舍」,附設的「美荷樓生活館」更展示左好多舊居民物件及生活片段,讓大家可重溫50-70年代的香港公屋生活。

生活館裡面,以「街招」形式張貼舊居民所分享的故事最令人深刻,亦值得我地反思現時生活態度; 為左爸爸一句「買個菠蘿包俾你食」可以開心成日,再因為無得食菠蘿包喊足成晚…可能大家會無法理解,因為今時今日,物質豐富都成為理所當然的事,回想上一代卻曾經歷過捱窮捱餓既日子; 老一輩食鹽多過你食米係真,因為佢地分分鐘連米都無得食,一樣食物可能係要同45678個兄弟姊妹分享,老土啲都要講,我地真係身在福中不知福,我地既字典仲有「珍惜」同「分享」呢兩個詞彙嗎?

舊時生活雖然艱難,但人情味常在,親人受傷靠鄰居輪流揹到醫院,抵得諗幫其他人養活仔女等…這種「人人為我,我為人人」精神喺香港恐怕愈黎愈罕見; 以前「遠親不如近鄰」,而家撞到鄰居連打個招呼都未必會,如同陌路人; 可能連返到屋企,都只會鎖埋房門,同屋人一樣零溝通; 社會雖然進步,但人與人的關係卻不斷退步……

為左讓市民更深入了解美荷樓的歷史,展館更召集一班舊街坊擔任導賞員;不過如果你地去美荷樓,我建議大家帶埋你地既爸爸媽媽、公公婆婆,因為呢啲歷史其實佢地都經歷過,發生地點可能有少少分別,但佢地既故事一樣咁精彩,佢地會係最好既導賞員...