銅鑼灣-天后廟
2013-11-05 16:13:49

周日落銅鑼灣,我地會去Times Square, 行下誠品書店,食個日本放題、法式甜品,再買下韓國衫褲、化妝品; 與其關心外國興乜,倒不如近在咫尺,到附近的銅鑼灣天后廟走走,好好了解香港既歷史文化?

早喺香港未被英國統治,甚至始於鴉片戰爭以前,由戴氏族人所建立的銅鑼灣天后廟已經存在,乾隆年間稱之為「鹽船灣紅香爐廟」; 天后廟主祀神靈為天后娘娘,每年農曆三月廿三日天后寶誕,都會吸引大批善眾參拜,祈求疵佑。

銅鑼灣天后廟係一座傳統的兩進式建築物,雖然經歷多番修繕,但仍保持着同治戊辰第二次規模宏大重修時的面貌,譬如話: 廟門橫額《天后古廟》四個大字,廟外平台石樑有同治七年的字樣,兩旁刻有道光廿五年(1845年)『興邑刁爵』字樣的石獅,廟內所擺設光緒廿八年(1902年)的銅聚寶爐和香爐等,通通都值得我地細看。

香港—一個看似國際文化匯聚的地方,繁華的同時,我地的歷史古跡又係咪變得容易被忽略、被遺忘? 如果每樣事和物都要到就快失去時先醒覺要去保護,清拆後先去懷緬,屬於香港人的根也會漸漸變得枯萎凋零…