​

如果你係香港島搭開小巴一路向西，當小巴去到皇后大道西與薄扶林道交界, 很多乘坐小巴往西營盤的乘客都會大聲叫 ”唔該，趙醒楠有落”！

趙醒楠跌打館已有超逾四十年的歷史, 係由已故的南華足球隊的隊醫趙醒楠所創立。自從趙師傅移民上天堂之後，趙醒楠跌打館就交俾佢嘅公子主理，而另一名公子就係跌打館旁邊開咗間西醫診所。趙醒楠醫館之所以出名, 除了醫術精湛外, 佢哋醫館出產嘅跌打油、跌打膏亦係起晒朶駛得嘅！

而家呢個年代嘅年輕人可能都唔知跌打係乜嚟嘅，係咪耆英嘅玩意？其實，跌打是中醫上的外科俗稱。普通的肌肉或骨折損傷都稱跌打。起源實在好久遠，好似話有中醫神農氏開始就有，而周朝已經出現有關的跌打醫書，好多人仍然覺得跌打比西醫骨科耍家得多！

「趙醒楠跌打醫館」經歷過無數風雨，仍然屹立不倒，緊守崗位。即使外牆嘅壁畫已破舊失修，但保留住昔日社會嘅情壞，亦見證咗西營盤變遷。

趙醒楠係早一兩代頑皮仔嘅集體回憶，打波百厭甩晒臼、整親手手腳腳，都會嚟呢度比趙師傅整翻掂佢！

其實自從港鐵落實直通西環，呢幾年西環陸陸續續都有好多老舖、舊樓敵唔住熱爆嘅地產市道, 被發展商收購而結業, 什至乎拆卸。究竟跌打呢個行業、趙醒楠醫館呢個西營盤老地標，仲可以係香港存在幾耐呢？

老朋友，可能見得一次，就見少一次。