當你行經中環卑利街同荷理活道交界，你一定會見到一幢有超過100年歷史的四層高戰前唐樓。

而今日「受保護小動物」要介紹嘅主角：＂公利真料竹蔗水＂，是香港的老字號舊式涼茶舖，就係呢幢戰前唐樓自1948年開業到而家，就己經服務咗街坊60幾年，橫跨咗兩個世紀！當中以其招牌竹蔗水最聞名，聽講前特首為食鬼貪曾都是此店嘅常客。

店內的擺設仍然保持一份上世紀五六十年代的懷舊味道，舊式青綠瓷磚、木枱與木櫈，彷彿見到一班擬似占士甸打扮嘅年青街坊聚在涼茶舖聽收音機，係超高樓底、天花大風扇下談天說地的年代。當時香港嘅公共交通不完善，中環斜路又多，平民街坊行至氣囉氣喘，經過公利，係櫃枱喝坏蔗汁即走，方便就手，而且當年醫療唔發達，窮人沒多餘錢看病。熱氣喉痛？全靠飮坏清熱蔗汁就當食藥啦。

係公利店內有張用相框鑲起咗、殘舊霉黃，由公利第一代老闆親自提筆，寫於 1948年教人種蔗的告示！告示內容提到種蔗所施的肥料，不能用人糞，亦唔可以化學物，得用花生麩，這樣竹蔗才會顏色潤澤，質地鬆脆，味道清甜微香。上幾代人真係用個良心嚟做生意！老板話：「做生意，一, 要真材實料，二, 不能罔顧公眾利益。人哋係想身體好先嚟飲你杯蔗汁，點可以呃人？所以做法一定要正宗。唔浸得糖水，唔隔過夜，咁先有食療功效，唔係飲咗都補唔返。」

而唔講唔知，本地蔗汁店出現的起緣，是殖民統治初期，英國人在新界發現不少野生蔗田，不過蔗的質素差劣，於是英國人由夏威夷引入優良蔗種，派人指導新界農民培植，部分供給糖廠做蔗糖原料，剩下來的榨汁喝，變成便宜又滋潤的飲品，而民間開始出現以蔗汁、蔗水為主打的飲品店。真係又再仆街啲講句，香港原來掂過碌蔗，真係全靠英國人。

去過公利的人，都一定見過「黎明」。事緣門口石柱一幅手繪海報，畫咗個好撚似黎明嘅男仔，係公利顧客嘅熱門影相位。但實情呢張海報係七十年代尾已經出現，當時黎明都唔知移民嚟咗香港未？

時代變遷，生意難撈，除咗蔗水，公利都有賣龜苓膏、五花茶、火麻仁、竹蔗茅根水及羅漢果水嘅清熱解毒飲品，價錢仍然維持街坊價，但老板始終堅持唔賣煎蘿蔔糕、咖喱魚蛋、炸魷魚鬚等熱毒小食！

相比而家嗰尐收維穩費，又賣冇龜嘅天價龜苓膏嘅所謂連鎖涼茶舖，公利嘅營商手法特別受人尊敬！近年蔗汁鋪一間間排隊結業，要找做法正宗的蔗汁店，全港獨剩一家公利。呢種街口老舊蔗汁店，嗰杯即榨新鮮蔗汁, 可能再唔去飲, 就冇得飲啦！​