​

提起香港中西區堅道嘅新藍塘，上世紀只要你曾經係高主教、明愛、聖心、聖貞德返學嘅中、小學生，新藍塘絕對係佢哋嘅集體回憶！好多學生嘅早餐同午餐，都係新藍塘攪掂！自六、七十年代起，新藍塘係堅道服務街坊大大話有超過五十年！

係上世紀七十年代，新藍塘原本只係賣西餅、麵包；到咗八十年代香港經濟起飛，佢哋亦都擴充埋後舖，做埋快餐店！

如果你係新藍塘嘅熟客，你一定熟悉佢哋啱啱出爐嘅咸豬仔包、十字包、排包、方包、車輪包好食到震嘅味道！而家店裡面重可以買到集團連鎖餅店冇嘅舊派餅食，好似紙包蛋糕、合桃批、蛋糕仔。

雖然門面同內籠頗為殘舊,一邊賣麵包,一邊賣快餐，但正正係上世紀七、八十年代嘅港式快餐店寫照！

是日快餐是螢光咖喱牛腩飯，加粟米湯！？定係想嚟客炸雞脾飯，唔要汽水要奶茶？唔，都係洋蔥豬扒飯加阿華田啱我口味！

小時候吃過的味道最係難忘。偶爾回憶一下中學時搭訕明愛秘書妹，就算粟米湯幾淡都係甜。

學生午餐30蚊有交易，午餐碟頭飯仍然大大碟，朱仔飽3蚊一個，係香港半山區真係難能可貴！隔離SOHO一杯啤酒都要成七、八十蚊。

希望保存了完好上世紀情懷嘅新藍塘，唔受地產霸權影響，繼續可以服務堅道街坊。