細說盆菜
2014-01-16 18:21:17

年近歲晚,一大班人圍埋食盆菜當團年飯,一邊夾住沸騰騰嘅豬腩肉,一邊同親戚歡懷暢飲聚舊,既係滋味,亦係一種風味。可能有人覺得盆菜只係一大堆食物共治一爐,同打邊爐無咩分別,但其實,盆菜嘅食材擺放係層次分明架,最矜貴既食物通常放喺最頂層,例如雞、海蝦等,用黎增添體面,中層係炸門鱔、南乳豬肉、土魷等等,而枝竹、豬皮及蘿蔔等食物就會放最底層,盡吸上層肉汁及醬汁精華,雖然稱唔上咩矝貴食材,但食落一樣濃郁惹味。盆菜師傅指,每樣食材要獨立烹調,以南乳、頭抽、蠔油等醬料調製先會入味!食盆菜多數以幾多圍做單位,份量需求之多,就連所用既鑊鏟亦要係非一般鑊鏟,十幾斤嘅南乳豬肉就要用個加大碼嘅鑊鏟先可以煮得到!
 

以前圍村人住得比較偏遠,為左慳番出外斬料嘅時間,圍村人會選擇用屋企現成嘅食材造成菜餚,用大木盤盛載成盆菜,以便招呼朋友; 以前爐頭少,又要斬柴,成村人份量嘅盆菜分分鐘就要用兩至三日,日以繼夜先可以趕起,唔似得而家有石油氣咁方便! 其實,為左迎合都市人需求,盆菜都經過多方面嘅改良,例如因衛生問題,而家嘅盆菜都由木盤轉用銻盤及以公筷食用,亦有為素食者以設既素盆菜出現! 今時今日,盆菜仍係每逢喜慶賀壽、結婚添丁,甚至賀新居入伙嘅意頭食品,呢個圍村風俗係唯一不變! 一村人大排延宴,分享喜悅嘅熱鬧氣氛,城市人未必有機會體會到!

近年,唔少大型飲食集團有樣學樣,喺新年期間推出以鮑參翅肚包裝嘅盆菜做迎節食品,十人份量,客人到拎貨時先發覺盆菜大縮水,所用既盆亦只不過係易穿易爛既鍚紙兜,雞有雞味? 可能食到既只有雪氣味,加埋大量味精,但就食唔到真正嘅鄉村節儉僕素本味! 雖然盆菜而家尚算長食長有,但被呢啲大量失真嘅食品充斥,真真假假,假假真真,「傳統味道」仲可以保存到幾多呢?! 何不反撲歸真,以盆菜宴與良朋友聚,一同感受團圓之意…